WILLEMSTAD,- Minister di hustisia, señora Magali Jacoba, den deklarashon pa EXTRA a indiká ku lo bai aselerá e proseso di pèrmit “Brooks Tower” pa e grupo di haitianonan ku a apliká p’esaki.

E minister a duna di konosé ku aktualmente ta kolektando e number dje petishon di haitianonan ku a apliká pa un pèrmit di estadia. Lo bai na aselerá e proseso aki, di manera ku asina tin e posibilidat ku avion por baha riba Haiti, esnan ku ke bai wak nan famia, por sali for di Kòrsou i drenta bèk. Esaki sigur ta konta pa e haitianonan ku kier realisá e biahe aki i ku mèldu nan mes.

Pa loke ta trata e grupo ku no ta kai den e proseso di “Brooks Tower” ku tin te febrüari próksimo pa sali for di nos isla, lo bai wak te kon leu, pa motibunan humanitario, por yuda nan regresá nan pais. Pero e mester sinta ku su konseheronan pa wak kon ta atendé ku e grupo aki, semper kedando den kuadro di nos leinan, e minister a indiká.

E ta pensa kisas e grupo aki lo por entrega nan datonan na ministerio di hustisia i asina wak kon ta regla pa nan regresá nan pais, pa yuda nan famianan ku a sufri dje temblor. E minister a enfatisá ku lo wak kiko ta bon p’e grupo aki den kuadro di lei.
Durante e proyekto aki, e grupo di haitiano ta esnan mas grandi ku a apliká pa un pèrmit di estadia riba nos isla.