WILLEMSTAD.- Durante di fin di siman último Komishon Hubenil di FFK a organisá weganan semi-final i final di e liga, ku partidonan den kategorianan U-11, U-13, U-15 riba tereno di Quick 60, miéntras ku e final di U-17 a tuma lugá den Stadion Ergilio Hato.
E final di e kategoria di edat mas haltu a bai entre Willemstad i Scherpenheuvel. E ekipo di Willemstad, bou direkshon di Tino Chance, a logra un viktoria ku skor mínimo di 1-0 pa titulá kampion.

Den e kategorianan mas abou a hunga e semi-finalnan riba djasabra i e finalnan djadumingu.
Den un bon ambiente, ku animashon di mayornan i fanátikonan di futbòl, a hunga e weganan. Den U-11, Willemstad a empatá 1-1 ku Jong Colombia pa despues den tiramentu di penalty titulá kampion di Kòrsou.
Den U-13, Scherpenheuvel i Quick 60 a batayá ku otro, pa finalmente Scherpenheuvel gana 1-0 pa bai ku e titulo.
Kategoria U-15 tambe a keda disidí mediante tirunan penal. Mahuma i Vesta no a skor durante dje partido i komo tal mester a tira penalty, ku resultado na fabor di Mahuma.
Komishon Hubenil di FFK ta felisitá tur e klupnan i ta gradisí lider- i mayornan pa e kooperashon ku nan a duna.